أكل العيش مافيهوش شكرا ..
أولا: كل سنة وأنتم طيبين بمناسبة الشهر الكريم
ثانيا : أحب احكيلكم حاجة كده
في يوم من أيام هذا الشهر الكريم وبعد الفطار كنت قاعدة أنا وصديقة مقربة ليَّ عشرة مده طويلة وزميلة دراسة وعمل كمان ,وحضرني موقف كانت هي معي فيه ,المهم فكرتها بيه وقعدنا نضحك ونسترجع ال موقف ونتحدث عن حال الشعب المصري ومواقفه الطريفة أو المحزنة ؟؟؟ الحكم لكم بقى بعد مااحكلكم
تعالوا نشوف
كلنا طبعا مشينا في شوارع مصر وشوفنا المرور عامل إزاي (إزاي يا ترى؟؟)-:) جميل طبعا وكمان أكيد جربته يعني موضوع إنك تركن سيارتك في وسط البلد أو الحقيقة هي مبقتش وسط البلد بس ,خلينا نقول في آي شارع أو حتى حاره عشان تقضى مصلحة أو تجيب حاجة ..المفروض إنه عادي يعني في أماكن ممكن تركن فيها أو لو تحب فيه جراجات بتحاسبك بالساعة وزي ماتحب أو على حسب المتاح في المنطقة .
لكن بقى فيه حاجة ثانيه موجودة في مصر (شغلة اللي مالوش شغلانة )
كنا أنا وصديقتي اللي حاكتلكم عنها عندنا مشوار في شارع القصر العيني وبنركن في مكان فيه سيارات كتير و صف أول ومافيش لافتة ممنوع الانتظار والمفترض إن مافيش مشكلة وإذا بي اوفاجأ برجل بيشاور و عمال يديني علامات بايده بالرغم من إني لا التفت ليه اساسا ولا طلبت مساعدته وركنت من غير مشكله بس طبعا كما تعلمون إن ديه بقت في مصر شغلة المالوش شغلانة والحقيقة أنا بعتبره نوع من انواع التسول.
واحد واقف كده وخلاص يركن ده وده وياخد قرشين ويروح .طب هو الناس مش هتعرف تقف لوحدها مثلا ؟
المهم اديته اللي فيه النصيبب بس الحقيقة معجبوش لإن بقى فيه تسعيرة لازم اديله 2 جنيه وطبعا هم اللي حديدوا التسعيرة ديه ولما بساله ليه؟ قالي لسة العسكري والظابط ..ان ان ان ان اااااان
يعني مش بس اهمال وبلطجة كمان الحكومة موافقة و زي ماأنتم فاهمين بقى .
واللهِ ده ولا الإتاوة أيام زمن البلطجة .
خلاصه الكلام اديته هاعمل إيه .بعد كده شوفت واحد تاني جايلي بفوطه كده مش عارفة أوصفلكم نظافتها وجمالها وداخل يمسح الزجاج أو بمعنى أصح ( يلاياطه ) شاورتله وقلتله شكرا شكرا ,,,,راح بصلي شذرا كده وضرب عرض الحائط بكلامى وكمل طليت قصدى تلميع !! و قالى"اكل العيش مافيهوش شكرا"
يعنى انا حتى مش من حقى ارفض او اقبل و بعد ما كان الواحد بيديهم شفقة اصبح حق مكتسب. لأن (اكل العيش مافيهوش شكرا) و عجبى.
طب فيه سؤال :من اعطى الحق لناس ديه يتحكموا في شوارع البلد على كيفهم ؟؟؟وكل واحد شافله حتة أرض واصبحت جراج سيادته الخاص الي ورثه عن جده .
وطبعا المواطن المصري كالعادة عليه إنه يتحمل أي شيء لانه ببساطة معندوش حل تاني ,واصبحت كل الشوارع بهذه الطريقه .
ولأزم تعمل حسابك لما تفكر تتجرأ و تركن فى ملك باشا من دول انك محتاج حوالى 10 جنيه كده عشان الى بيركنك فى ملكه و الى بينظفلك و هكذا.
طب ممكن حد يقولى ان كنت غلطانه .هل هذا مقبول؟؟
إقرأ أيضا: أكل العيش مافيهوش شكرا ..
إقرأ أيضا: يبقى أنت أكيد في مصر
إقرأ أيضا: الهنود ... الأكثر سعادة في العالم
إقرأ أيضا: الألمان يركبون الدراجات؟؟.. وإيه يعني؟
شارك الموضوع وتابعنا على الفيسبوك (عوالم منسية) أو تويتر أو اشترك بالقائمة البريدية ليصلك كل جديد على بريدك |للتعليق: اضغط على "إضافة/إرسال تعليق" أسفل المقالة |
للمراسلة: enbee.info@gmail.com
اغنية يبقى انت اكيد فى مصر سنة كام؟
تحميل اغنية يبقي انت اكيد في مصر Mp3
يبقى انت أكيد في مصر كلمات
تحميل اغنية لما تلاقي الجد في ايده حفيده Mp3
ما معنى أكل العيش مر؟
ما هو تفسير أكل العيش في المنام؟
هل العيش هو الخبز؟
ما تفسير أكل العيش الناشف في المنام؟
أكل العيش مر
عيش جنوبي
أنواع العيش
معنى عيش بالانجليزي
معنى العيش
كتاب أكل عيش
عيش رز
عيش حب
تعليقات
مقبول جداً!!! لأن دول لو ما استرزقوش من الشوارع بالغتاته على الناس والهمبكة والتسول المقنع... هيبقوا قطاع طرق وهجامين ونشالين وبلطجية.. والحكومة عارفه كدة كويس قوي ... عشان كده سايبينهم يعملوا اللي هم عايزينه... وأهم برضه في الشوارع تحت نظر أمناء الشرطة وظباط المباحث.. وأهم بيفكوا أزمة لما الظابط ما يعرفش يمسك حرامي ولا قتال قتلى
.. أهو يمسك واحد من دول يسدد بيه خانات المحضر والنيابه تبقى تطلعه بعدين
عادي يعني
بصي.. هي مالحاش حال غير واحد من اتنين.. يا إما نسيبها ونمشي وننساها ونريح دماغنا من الوش الأزلي ده ... يا أما قنبلة نووية تمسحها ونبنيها من جديد على نضيف
أهلاً بيكي في وطنك
تسعدني مشراكتك مع دوبي يا باراكودة
في رأيي الشخصي ده طبعا كلام مينفعش خالص وهو صورة من البلطجة المقنعة ولكن هذا هو واقع تعيشه المحروسة في وقتنا الحالي.وكما تفضل باراكودة بالتعليق أهم بيسدو خانة لما الحكومة تعوز تمسك حد عشان عادية معينة زي كده قاتل بنت ليلى غفران.لو ماكانش في حد غلبان وهو والشارع بتاعه ملوش ثمن زي مالظابط قال ,ماكناش هنلاقي واحد نلبسه قضية قتل مهمة زي دي.ولكي الله يا محروسة,ويجعله عامر
بس يا جماعه احنا دايما بناخد دور النقاد بمعنى ايه ؟
ان كل واحد مننا بيقول المشكله بتاعته او الموقف اللى شافه او حصل قصاده لكن مش بنعرف نحل حاجه يعنى لو انت شغال فى شركه وكل شويه تعرض المشاكل اللى بتواجهك للمدير بتاعك او فى اجتماع لكل اعضاء مجلس الاداره تفتكر الرد هيكون ايه ؟ هيقول يا جماعه اللى عنده مشكله يعرضها ومعاه حلها ونناقشه كلنا ونشوف الحل ده يتماشى مع ظروفنا ولا لآ فلو حد مننا مكان الراجل ده كنا هنعمل ايه للاسف هو اعتاد على الشغل ده ومافيش حاجه يعملها غير كده واكيد فاتح بيت وعنده اسره يعولها فطبيعى جدا انه اكل العيش مافيهوش شكرا لان احنا من وجهة نظره لابنرحم ولابنخلى رحمة ربنا تنزل وفى النهايه مافيش حاجه فأدينا نعملها غير اننا ناخد ثواب لما نساعده على تربية الاسره اللى وراه بدل ما يقعد تحت الكوبرى يمد ايده للرايح والجاى وربنا يقدرنا على فعل الخير وانا عارفه ان فى ناس كتير ممكن تقول ان دى سلبيه مننا بس هنعمل ايه؟ ايه الحل اللى ممكن نقدمه للناس دى؟
واخيرا اسفه انى طولت عليكى بس فعلا فى حاجات زى كده كتير وياريت نعرضها ونتناقش فيها كلنا مع بعض يمكن نلاقى حل
شكرا جزيلا لمشاركتك معي دائما ,ولكن اسمحي لي في مليون ألف طريقة ممكن نساعد بيها الناس ونخدم مجتمعنا غير كده ولو فكرنا بالطريقة ده يبقى هنساعد المتسول برده اللي ممكن جدا يكون اغنى مني ومنك ,وال حقيقة يعني أنا بشوف إن الواحد لازم يتعب نفسه شوية في التدوير على المحتاج الحقيقي اللي ربنا عز وجل قال عنكم وتحسبهم اغنياء من التعفف ) فعلا واللهِ )الناس ده بيبقى في أحوج مايكون لقرش وماتطلبش فعلنا احنا بقى واجب ومسألة البحث عنهم بس احنا بقى بنستسهل وندي اح واحد مادد ايده في الطريق ونقول غلبان وأنا عايز أعمل خير وفيه الحقيقة احنا بنخدع نفسنا وبنسيب المحتاج الحقيقي محدش سائل عنه وفي نفس الوقت بنشجع متسول على الشحاتة وضرينا المجتمع بدل ماننفعه .
وطبعا نفس الحال بالنسبة ل الناس ديه وطبعا أنا مش بلوم حد بذاته ماهو خطأ منظمة كاملة .
صحيح أنا مش في يدي حال ولكن على الأكل ادينا بناقش سلبيتنا بدل مانضع رأسنا في التراب زي النعام .
عزيزي نونا هذه ليست قسوة قلب فانتي تعرفينني جيدا و تعلمين حبي للخير ومساعدة عباد الله قدر المستطاع ولكن فقط نريد أنا نفرق جيدا بين الخطأ والصواب لنستطيع أنا ننهض بأنفسنا ومجتمعنا ...عايزين نطلع لقدام بقى ,,,لحد امتى هنفضل ندري عيوبنا و بلدنا عمالة من السيء للاسوأ في حين إن بلاد كتير كانت اقل منن بكتير بقت أفضل كتير .واحنا لسة بنعتبر الكثير من الامور الخطأ ثواب ..واللهِ دينا بريء من كل ده .بس احنا بنسيء لصورة الاسلام بأيدينا .وربنا يصلح الحال .
عذرا لاطالطي .
مع تحياتي