الزواج... هل هو صفقة خاسرة؟

اعزائى زوار المدونه ، ربما تتسألون ما المقصود بالصفقه الخاسره و يا ترى الصفقه ديه ليه خاسره و ما نوع الصفقه (اى نوع من البزنس يعنى) ربما يخطر على بالكم افكارا كثيره و لكن يا ترى يا هل ترى ....يأتى الى اذهانكم ان تلك الصفقه هى

الزواج !!! نعم الزواج ,,نعم نعم لم اخطأ فى التعبير.. هو الزواج بعينه .

"الزواج " هذا الرباط المقدس الذى وصفه المولى عز و جل فى كتابه الكريم بالميثاق الغليظ.

فى قوله : {وَأَخَذْنَ مِنكُم مِّيثَاقاً غَلِيظاً}

و الميثاق هي الكلمة التي عقد بها النكاح اى العقد. و كلمة «الميثاق الغليظ» لم ترد في القرآن إلاّ في عقد الزواج، ما يوحي بالأهمية الكبرى التي يوليها الله سبحانه للعلاقة الزوجية بما لا يوليه لأية علاقة أخرى، لأن أية علاقة إنسانية في الموارد الأخرى تختص بجانب من جوانب الحياة الخاصة للطرفين، بينما تمثل علاقة الزواج اندماجاً روحياً وجسدياً في كل المدى الزمني الذي تلتصق حياتهما ـ فيه ـ ببعضها في الليل والنهار في المفردات الصغيرة والكبيرة، على هدى التعبير القرآني: {هُنَّ لِبَاسٌ لَّكُمْ وَأَنتُمْ لِبَاسٌ لَّهُنَّ} فكأن كل واحد منهما يلبس الآخر ويدخل في داخل شخصيته، الأمر الذي يترك تأثيره العميق الواسع على كلٍّ منهما في طبيعة حركة حياته وقرار مصيره، ما يفرض الكثير من التأكيد والتوثيق في خط الالتزام من موقع عمق الكيان لا سطح الكلمة.

و بالرغم من هذا الوصف الإلهي الرائع نسفهه و نحقر من شأنه نحن بوصفه انه صفقه و يا ليتها صفقه مربحه بل صفقه خاسره ايضا.

ما اظلم الانسان

هذا و صف الدكتور ايمن للزواج ، قرأته بالصدفه حينما كنت اتصفح الانترنت والحقيقه الموضوع شدنى جدا وحبيت ابعته لمجموعه من اصدقاء دوبى على الفيس بوك لنتحاور ونتشارك الأراء المختلفه معا ولى صديقه عزيزه الحقيقه ردت على مقاله

الدكتور باستفاضه فأردت مشاركتكم جميعا معنا .

سوف اضع مقاله الدكتور و رد صديقتى اى الرأى و الرأى الأخر دعونا نتفاعل معا و كل واحد يقول رأيه.

ده لينك موضوع د/ ايمن

http://www.islamonline.net/servlet/Satellite?c=ArticleA_C&cid=1173695350857&pagename=Zone-Arabic-AdamEve/AEALayout

و ده رد صديقتى

كتبت نونا

لو سمحتولى انى اقول وجهة نظرى ولو انها هتكون وجهة نظر طويله شويه

اولا انا مش متفقه معاكم على كلمة صفقه هو الموضوع مش تجاره بين رجال اعمال او فى البورصه ولازم حد يكسب فى النهايه لا طبعا دى اسمى علاقه واسمى رباط وهو الرباط المقدس فكلمة صفقه دى مالهاش وجود فى العلاقه بين الزوجين اما عن باقى المقال فخلونا كده نمسك جزء جزء

* الامومه اظن هى هتبقى ام وانت كمان هتكون اب ولا الاولاد هيقولوا انكل بدل بابا ولو انت من البدايه مش حاسس ان الابوه دى حاجه شداك او حاجه محتاجها فخلاص ابعد عنها من البدايه ومافيش حد هيغصب عليك فحاجه

وكون ان البنت وهى صغيره بتلعب بالعروسه لان الحنيه دى ميزه وصفه من صفات المرأه ولعب الولد بالعربيه المدرعه والمسدس ده لان الاولاد بيكون عندهم طاقه عاليه شويه عن البنات وبيميلو اكتر للعنف ولو حلم انه هيحكم العالم وانه قائد ظافر ده دليل على العنف الداخلى والطاقه الزايده ودليل على حب السيطره والتحكم واحيانا الغرور والكبرياء اما عن الحماقه او الخضوع تحت سيطرة امرأه تحكمه فى الحاله دى بيكون العيب فى شخصيته هو ومش كل الرجاله بيتحكم عليهم ولو حب يعمل حاجه هيعملها بمزاجه مافيش حاجه بتتعمل غصب عنه.كمان دى بتوضح مدى ذكاء المرأه الخارق وبعد نظرها وقدرتها على التفكير فى اكثر من موضوع بينما الرجل لا يستطيع التفكير الا فى موضوع واحد فقط وليس لديه طولة بال او صبر يعنى بيحب ينجز فى الامور ولكن المرأه عندها طولة بال وقوة تحمل وصبر شديد بدليل انها بتقدر تشتغل جوه البيت وبره البيت وتمشى اسره كامله وتحللهم مشاكلهم مشاكلهم وتذاكر للاولاد وتستحمل عصبية الزوج وتكشيرته دايما بسبب مشاكله فى الشغل

*اما بئه عن فكرة الحقد على العزاب

اولا اللى عايز العسل لازم انه يستحمل قرص النحل فلو شخص مش عنده الرغبه فى الزواج وسعيد بالعيشه اعزب خلاص ايه اللى يجبره على الحياه الكئيبه اللى اتوصفت دى هنقول كلام الناس ايه يعنى الناس بتتكلم عن الاعزب والمتزوج والارمل والمطلق وحتى على الجنين فى بطن امه ولكن لابد وان يفكر اذا مرت عليه السنين بدون زواج وكبر فى السن وهو عايش حياة العزوبيه او حياة الضياع او السعاده المؤقته وجه الوقت االلى هتكون محتاج فيه زوجه ترعاك فى مرضك او ابن يحملك وقت شدتك هتعمل ايه بئه فى الوقت ده ؟ هتقول ياريت اللى جرى ماكان؟ وده كلام ناس مجربين مش كلامى انا

*نيجى بئه لشيال الهانم

لو اخدنا كلمة الهانم من الناحيه الدنيويه قصدك يعنى الست المدلله ذات الخدم والحشم طيب يعنى هو عيب ان مراتك تعيش هانم؟؟ ياسيدى والله يبقى كتر الف خيرك انك معيشها هانم ده طبعا لو الكلام ده حقيقى وان فى ست عايشه العيشه المرفهه اللى انت بتوصفها دى ولو من الناحيه الدينيه فديننا كرم المرأه ووصى على حسن معاملتها ومعاشرتها (رفقا بالقوارير) انت بئه عايز تغير ده وتعمل زى هارون الرشيد وتلم الجوارى حواليك؟؟ وبعدين ايه المشكله لما تشيل شوية حاجات تقيله شويه دى مراااااااااااتك عارف يعنى ايه مش عدوتك ولا حاجه لاسمح الله وبعدين كلمة عبدا مجانيا لو بصيت كده شويه فى بيتك ولو كنت غير متزوج بص فى بيت والدتك شوف ازاى البيت ماشى زى خلية النحل من تنظيف مع اعتراضى طبعا على استخدام كلمة الاعمال القذره اللى استخدمت فى المقاله فهى بتنظف وتغسل وتكوى وتذاكر للاولاد وتسهر على المريض منهم ده غير تفكيرها فى جوزها ولو كانت مزعلاه شويه مش بتسكت الا لما تصالحه وتفتكر عيد ميلاده وعيد جوازهم لان كل مناسبه ليها ذكرى حلوه بينهم وطبعا كل الذكريات الحلوه دى ليها يوم جميل مع الزوج يعنى الحياه مش كلها نكد كده زى مابتقول وفنفس الوقت نلاقى الزوج بيقول انها بتفكر فى حاجات تافهه ودى واحده دماغها فاضيه وعلى فكره ممكن الزوجه دى تكون بتشتغل يعنى عامله زى المكوك بره البيت وجوه البيت فلو حتى مثلت او ادعت انها مريضه كما وصفها اكيد ده بيكون رد فعل منها عند الشعور من ناحيتك انك اهملتها شويه او مش واخد بالك اظن الست الهلكانه معاك دى يوم ماتكون تعبانه او بتدعى المرض حتى !!!! فأنت مش هتخسر حاجه لو حسستها انك مخضوض عليها وشوف هى بتطلب منك ايه حاجه بسيطه جدا انك تحسسها انك لسه بتحبها وانك ممكن تتخض عليها لو تعبت اما بئه اذا كانت مريضه فعلا يعنى مش بتمثل عليك ولا حاجه طبعا الواجب عليك انك تراعيها ولكن اللى بيحصل انك بتفكر اول حاجه تعملها انك تبعتها بيت اهلها عشان يخدموها هى والاولاد لانك مش هتعرف تخدمها واذا طبعا فترة المرض طالت شويه هتفكر تتجوز غيرهالانك مش عارف تعيش وحيد وان حياتك بدون ست تراعيك وتشوف مصالحك صعبه وكأنك اول مره تعترف بأهمية الست فحياتك ده غير بئه ان عدم شغلهاوهى تعبانه هيقلل الدخل بتاع الاسره لان المرتب بتاعها اللى كانت بتدفعه فى البيت او لدروس الاولاد وقسط المدرسه خلاص مش موجود او اصبح بيتصرف على علاجها يعنى كمان مش انت اللى هتصرف علي علاجها على الرغم ان لو حصل العكس يعنى الزوج هو اللى تعب هتلاقيها سهرانه تحت رجله تراعيه حتى يشفى واذا توفى احتمال كبير انها تعيش بدون زواج لرعاية اولادها طبعا الراجل لو هى اللى ماتت هيتجوز على الاربعين وده هيكون استحمل اربعين يوم بصراحه كله ذوق فضل صابر اربعين يوم بعد وفاتها بدون زواج وكمان استحملها طول فترة مرضها ياسلام اصيل

*اما عن موضوع المملكه الخاصه بيها فأنت ايضا ملك فى هذه المملكه ولو كانت هى فرد عادى فى اسرتها زمان فأنت كنت كده برضو فى بيت اسرتك ويمكن انها كانت واحده مدلله جدا داخل الاسره وان بيتك ده هو جحيم مش جنه ولا مملكه زى مانت بتقول وعلى الرغم من كل ده بنلاقى الزوجه اللى كانت مدلله فى بيت اهلها اصبحت الفلبينيه الخاصه بحضرتك وبأولادها وكل واحد عند اهله بيكون غالى يعنى وصفك لبيت الام وعطاءها الكبير وحنانها اللى مالوش حدود ده يدل على مدى تعارض كلامك فى الاول واعتراضك عن الحنيه المخلوقه بالفطره لدى البنت هى مش والدتك دى زمان كانت فى نفس الوضع بتاع مراتك دلوقتى هل هى دى وجهة نظرهم كان بيت والدتك اصبح جحيم مش جنه زى مانت بتوصف وبعدين احيانا الزوجه بتغيير على زوجها حتى من امه لانها بتحب تحس ان جوزها مش بيرتاح غير فى حضنها ومن ناحية الحنين للماضى والايام الخوالى الزوجه بتحب تحس بعد عناء طول الاسبوع ان فى يوم كامل ليها هى وجوزها بس ولكن الزوج بيحب يقضى اليوم ده مع اصحابه عشان يعود لايام العز اللى بيقول عنها وهى تقضيه مع اهلها او اصحابها واعتقد انها هتوافق وترحب لان دى حاجه هتسعدكم انتو الاتنين

*بنك متحرك

والله انتشر فى الفتره الاخيره ان فى زوجات كتيره هى اللى بتصرف على البيت والزوج والاولاد وبعدين الدين لما قال ان القوامه من صفات الرجل برضوا قال ان الحياه تعاون ولو انت بتشتغل صرف عليها وبعدين مافيش ست هيكون جوزها بيصرف عليهاوقايم بكل مسئولياته كامله وهنقول انها عايزه تشتغل عشان المساواه والنديه لا طبعا اكيد طبعا هتفضل انها ترتاح فى بيتها وتعيش معززه مكرمه لكن بنشوف الزوج اول مايطلب منه شئ يقول يوووووه هو انتى على طول هات هات عايزين وعايزين انا هجيب منين الخ ... من الكلام ده وبعدين دلوقتى مافيش راجل بيصرف على البيت من الالف للياء كل حاجه مشاركه

*البراجماتيه والانوثه طبعا ربنا له فى ذلك حكم ولو ينفع زواج المرأه من اخرى كان حصل وكان هيبقى برضو فى متعه لكن ربنا اعلم بلافضل والامتع للبشر وكمان جعل الزوجين سكن لبعض والحياه بينهم تجعل كل طرف محتاج للاخر اما عن مواقع الزواج مش شرط ان كلمة غنى يعنى فلوس كتير وكلمة كريم مش معناها انه بيصرف شمال ويمين لكن ممكن يكون كرم فى المشاعر فكيف بعد كل ماقيل عن عطاء المرأه لازالت لا تعطى شئ ؟؟!!!

*هارون

المرأه دايما بتحب الرجل اللى يستمد قوته من ضعفها وهى دايما منكسره عشان هى محتاجه لوجوده فى حياتها ودى الفطره اللى ربنا خلق المرأه بيها تعمل ايه طيب ولو انت مش ناوى على زواج يبقى بلاش تدخل البيوت وتقبل العزومه وبعدين الاهل بيعزموا شاب اعزب عشان يجوزوا بنتهم ايه المشكله عايزين يطمنوا على بنتهم ولو نفتكر سيدنا شعيب عمل ايه هنلاقى ان موقف الاهل كان موقف عادى

*لماذا الهوان

لو انت مش عايز تدخل فى المعركه الخسرانه دى فقول بئه يا نحله لاتقرصينى ولا عايز عسل منك مش نقول بقره وكوب اللبن والجبنه الرومى والبقال مع انك متأكد جدا من جواك انك محتاج المرأه فى حياتك بسبب الهرمونات اللعينه اللى انت بتقول عنها وبعدين لما الدين والشرع حرموا العلاقات وحللوا الزواج عشان اللخبطه والعك والكوكتيلات الوحشه وليه تبص لسندوتش جبنه وانت معاك كابوريايه جميله وعلى فكره انا اصريت انى ارد على المقاله لانى لو فكرت اتجوز مش عايزه تكون دى الافكار المعروفه عن الجواز والا قلته احسن ولو مافيش تعاون بين الطرفين وقلوبهم على بعض يبقى ياالف خسااااره واخيرا

اسفه جدا للاطاله عليكم

هذا رد صديقتى كما كتبته و فى انتظار مشاركتكم

عذرا على الاطاله

إذا أعجبك الموضوع: تابعنا باستمرار من خلال صفحتنا على الفيسبوك: مجلة لاكي سترايك