الحياة مع سكّير

هل فكرت مرة الحياة بيكون شكلها ايه لما تضطر انك تعيش حياتك او يكون في بيتك واحد سكير ؟؟...
 على الرغم ان مناظر السكر مالية تاريخ السينما المصرية والمخرجين المصريين - الله يبارك لهم بقى - على مر التاريخ صوروا المصريين وكأنهم اتولدوا والقزازة في بقهم مش البزازة !... لكن في الواقع نسبة كبيرة من الناس ماشافتش الخمرة دي ولا تعرف شكلها ولا ريحتها ولا تأثيرها شكله ايه.... بل اني مستعد اقول انهم ممكن حتى ما يكونوش شافوا واحد سكران غير في الافلام وهو ماشي بيطوح آخر الليل وهو بيقول بعلو صوته : انا جدع ع ع ع ع !

الكلام ده ممكن تحسه قوي زوجة ... ربنا ابتلاها بزوج سكير.. والحالات اللي زي دي كتير ... او عيلة يكون والدهم سكير مثلاُ ومضطرين يتقبلوا الموضوع ده لانه مافيش فايدة لا الراجل هيتغير وبعدين ابوهم هيعملوا معاه ايه؟ . أو واحد يسافر بره البلد ويضطر انه يعيش مع ناس بالشكل ده سواء كان في دولة عربية ولا أجنبية .

لما بيكون في واحد سكير قريب منك ويبدأ يشرب .. انت بعد شوية صغيرة ما بتتعاملش مع الشخص نفسه... انت في حالة سُكره .. بتتعامل مع تأثير الخمرة مش الشخص.... يعني حتى الضرب ماينفعش لأنه ببساطة مش هيفتكر انو انضرب او حتى اتعور او انجرح ... وهم وظروفهم بقى .. ساعات تقلب غم ونكد... وممكن عياط... وساعات تقلب برغي كتير يمتد لساعات وزعيق وكلام فارغ مالوش اول من آخر... ساعات تقلب بغناء ومرح ومسخرة وقلة قيمة... وتفتفه في وش اللي قاعدين .. ممكن وهو سكران وقايم يتطوح ورايح الحمام يقع بسهولة او يتكعبل وهو مش حاسس ويتعور وتبقى مشكلة انه حتى مش حاسس بالجرح ....

والمشكلة انها لو مرة وتعدي او في نهاية الاسبوع كانت هانت .. المشكلة بقى لما بيبقى ادمان يومي ... انا شفت ناس لازم لما تيجي عليهم الساعة 7 مساء لازم يكون في البيت ولو اتطربقت السما على الارض ... بيرتب حياته وظروفه انه لما تيجي عليه الساعة 7 يكون لوحده مع القزازة . وإلا... الدنيا تقلب ضلمة وتبقى دندرة.

وايه اللي يحصل بعد كدة ... يتخمد ينام زي القتييييل وصعب اوي انو يصحى غير لما يصحى لوحدة ... وطبعا في الغالب بيصحى جعان جداً زي المجنون... وساعات الجوع يقرصه وهو نايم يصحى ياكل وينام تاني لأن السبرتو ولا الكحول بيقبى عامل زي ماية النار في المعدة.. علشان كدة اخترعوا المزة جنب الشرب دايماً


والمشكلة انها لو مرة وتعدي او في نهاية الاسبوع أو في ناس تحب تشرب نبيت مع الأكل كانت هانت .. المشكلة بقى لما بيبقى ادمان يومي ... انا شفت ناس لازم لما تيجي عليهم الساعة 7 مساء لازم يكون في البيت ولو اتطربقت السما على الارض ... بيرتب حياته وظروفه انه لما تيجي عليه الساعة 7 يكون لوحده مع القزازة .

وايه اللي يحصل بعد كدة ... يتخمد ينام زي القتييييل وصعب اوي انو يصحى غير لما يصحى لوحدة ... وطبعا في الغالب بيصحى جعان جداً زي المجنون... وساعات الجوع يقرصه وهو نايم يصحى ياكل وينام تاني

وطبعا نومه مش نوم هادئ ولا حاجة ... ده نوم سكران يعني برضه في احلام مزعجة وهبد في السرير وتقلب هنا وهناك وممكن برضه يكون زي القتيل .

وطبعا الريحة - ريحة الكحول بقى وعلى حسب النوع اللي بيشربه وكل ما كان ارخص كل ما كان أنيل - بتكون لا تطاق في البيت وريحته هو شخصياً .. ريحة أنفاسه مايعلم بيها الا ربنا وطبعا ريحة الحمام بالذات .. الله يكون في عون الزوجة اللي تضطرها الظروف انها تنام جنب جوزها السكران أو لما تعاشره..

ولما يصحى الصبح... تلاقيه كلامه قليل ومزاجه متعكر واخلاقه ضيقة وزي الزفت وممكن يخانق دبان وشه.... لانه في الغالب بيكون مصدع أو مدروخ أو بالانجليزي عنده (هانج أوفر) ... تلاقيى عينه حمراااااا وحاسس انو مش فايق علشان كدة تلاقي شرب القهوة على ودنه يمكن يصحى... ده غير الريحة في انفاسه..... وغير التورمات اللي بتكون على جلده أحياناً في السُكرية المخضرمين... من احتباس المايه في الجسم من تأثير الكميات الكبيرة من الكحول في الجسم على مدى فترة من الوقت .

وتبقى الحكاية نيلة منيلة بنيله لو الباشا السُكري خلط اكتر من نوع في نفس الوقت .. السكر بيضاعف والتأثير بيكون اشد وممكن يتعب بعدها يوم أو يومين... هي المعدة هتستحمل إيه ولا ايه ؟

سلوكيات الخمر
في ناس بتشرب بشكل اجتماعي ... يعني في حفلة مثلاً او في راس السنة أو غيرها ... وكل واحد بيكون عارف ميزانه قد ايه ومايزودش عنه علشان يعرف يكون متوازن ... وبرضه بسأل نفسي.. طب لما انت عايز تكون فايق شوية بتشرب من أساسه ليه ؟؟

وفي ناس ما تقدرش تتحكم في نفسها .. بعيد عنكم زي التبول اللاإرادي ... ما يصدق يشوف قدامه اي كمية لازم يقضي عليها وده طبعا بيكون مسخرة المكان بالنسبة للفايقين وتريقة اللي حواليه.

اجتماعيات السُكر
طبعا اللي بيشرب بيكون دايما محتاج الصحبة في الشرب... ومايحبوش ان يكون في حد صاحي أو فايق في القعدة .. بالظبط زي قعدات الحشيش منها صحبة ولمة علشان بالنسبة لهم ده نوع من الترفيه وهو ده الهدف من الحكاية .. وفي الغالب بيكون سببها ان في واحد شايل الليلة وجايب المشروب والباقي بس عليهم السكر !! وفي حالات تانية بيكونوا متقاسمين تمن المشروب ... وغير انهم بيهرجوا ويضحكوا سواء بقصد او غير قصد وفي نهاية القعدة لازم الاقل سكر يساعد علشان يروحوا اللي نايمين.

وغير انها برضه نظام اجتماعي لأن حتى اللي بيبطل شرب لازم يقطع علاقته بأصحاب قعدة الشرب علشان لو استمر معاهم حتماً هيرجع للي كان فيه

وطبعا لو كان في ست عاقلة عندها شوية عقل لازم بيوصل الموضوع للطلاق .. لأن الراجل في الحالات الصعبة بيتحول لخنزير .. كل همه الشرب والسكر وحتى لو اتهدت الدنيا... هروب وانسحاب وبيحل مشاكله ومناقشاته بالشرب دايماً

الإدمان
طبعا لما يدمن خلاص... الموضوع انتهى عائلياً واجتماعياً ... والناس الفقرا لما يدمنوا هتلاقيهم في الشوارع بيتسولوا علشان يجيب تمن الإزازة .... واذا كان ميسور هتكون عيلته هي الضحية وفي الغالب بيموت بعد 20 او 30 سنة من ورا الشرب وأشهرهم رشدي أباظة وغيره كتير اللي ماتوا من ورا امراض اغلبيتها الكبد بسبب الشرب

مواقف حقيقية :
واحد سكران قام بالليل طبعا عايز يدخل الحمام من كتر السوائل اللي بيشربها ... حتى ما قدرش يميز الحمام من الدولاب .. وفتح باب الدولاب أوضة النوم وبدأ في التبول وخلص عاااااادي جداً وراح نام... اكتشفوا الموضوع امتى ؟؟ تاني يوم الصبح ! الخدامة شافته بالليل لكن هتعمل ايه؟ سكران

واحد تاني جرس الباب رن وهو مسطول على الكنبة ، رن جرس الباب ، ماقدرش يميز اذا كان باب اوضته مفتوح ولا مقفول دخل فيه عادي جداً وطبعا اتعور وكل اللي شافه الدم على هدومه.. لكن هل حس بالوجع بعد شفايفه ما اتفتحت ؟؟؟ أبداً .. وصحي تاني يوم الصبح يسأل اللي كانوا معاه هو حصل ايه بالضبط ؟

واحد هندي قاعد في نايت كلاب شرب وسكر وفي شلة تانية خليجيين قاعدة على ترابيزة تانية ، بص لواحد منهم وقام وقاله وشك مش عاجبني ... طبعا اخد علقة موت ووشه بقى شوارع وجه تاني يوم المكتب لابس نظارة شمس .. قال بيخفي آثار العلقة اللي اخدها ليلة امبارح!

أكيد كلنا سمعنا من هنا ولاهناك عن راجل كبير يعتدي على بنته... وراجل تاني يطرد مراته - وهو سكران في انصاص الليالي - قال علشان مش لاقي القطة بتاعته ... والتاني كان يروح بيت اخوه وهو سكران ويقعد للساعة 3 و4 صباحاً يشتم ويزعق ويسب ويلعن في مراته ويتهيألوا انها بتسرق فلوس من وراه علشان تشتري أرض !!!! ... ولما يصحى الصبح ما يفتكرش حاجة من ده كله
...والمواقف من دي كتير قوي

طيب في حل ؟؟؟
جماعة معارفنا كان ابوهم الله يرحمه سكري من سنين طويلة ... لما كبروا وفهموا وهو كما كبر .. اجتمعوا عليه وقرروا ان ولا واحد منهم هيجيبله ازازه علشان يفهم انه خلاص بقى ماعادش محتمل .. لما لقى ان مافيش حل بقى يلجأ لأولاد أخوه يجيبوله اللي هو عايزة وألا يشتكيهم لأخوه

ختام
أما ليه بقى الناس بتدمن الشرب... لأنها زي المخدرات ... هروب من الواقع... غيبوبة اتعودوا عليها وبيحبوا تأثيرها رغم معرفتهم الكويسة جدا للمخاطر والبلاوي المصاحبة ليها ... هروب وانسحاب من واقع لو عاشه بكامل قواه العقلية يتعب .... علشان كدة يلجأ للخمرة لغاية ما يدمن الكحول نفسه ومايقدرش يعيش من غير حالة التوهان اليومية اللي بتساعده على احتمال الواقع بتاعه اي كان ... غربة ... تعاسة في الحياة... فقر... بعد عن الأهل والأحبة أو غيره . وتبدأ أيده تترعش واعصابه تبوظ ساعة الشرب لو إتأخر شوية ....... في ناس تانية بتبقى مستريحة والمسألة بالنسبة لها تعود وفرفشة ولمة أصحاب.... في ناس تانية بالنسبة لها السكر والخمرة وجاهة اجتماعية - يعني نادي خاص بيه هو واللي زيه - و بكدة يفصل نفسه عن عامة الناس اللي كلها بتشرب بيبس وكوكا كولا اليومين دول... يقولك قال بيهضم بعد الأكل ... وفي شباب بقى ما لهمش فيها بس يقولك اهي تفاريح وفرفشة في يوم ولا يومين في السنة وتجارب لابد منها

وعلشان كل ده كان رأي الدين في الموضوع ده

{يَا أَيُّهَا الَّذِينَ آمَنُوا إِنَّمَا الْخَمْرُ وَالْمَيْسِرُ وَالأَنْصَابُ وَالأَزْلامُ رِجْسٌ مِنْ عَمَلِ الشَّيْطَانِ فَاجْتَنِبُوهُ لَعَلَّكُمْ تُفْلِحُونَ }

المائدة /90- 92.

صدق الله العظيم

إذا أعجبك الموضوع: تابعنا باستمرار من خلال صفحتنا على الفيسبوك: مجلة لاكي  سترايك أو على تويتر أو اشترك بالقائمة البريدية ليصلك كل جديد على بريدك من: هنا | للتعليق: اضغط هنا

Searches related to الحياة مع سكير
شرب الخمر والجنس
ماذا يحدث عند شرب الخمر
شربت الخمر مع زوجي
شعور شارب الخمر
ماذا يفعل الخمر بالعقل
علامات شارب الخمر
ابي اشرب خمر
شربت خمر بالغلط