إللي ليه ضهر ما ينضربش على بطنه
في يوم من الأيام طلع الحرامي يسترزق ... دور على ركن مستخبي في شارع هادي وأخد له ناصية وقعد يستنى ضحية تكون هبلة... وعشان حظه النهاردة كان حظ عواااالم ... وأوب يامعلم .. فجأة جاتله إللي عليها العين.. قشطة يامعلم الشغل ابتدى
الست راجعة من شغلها ماشيه في الشارع بتتمختر ولا على بالها وبتغني : بمبي .. بمبي.. بمبي .. بمبي... ياختي عليا وعلى جمال أمي ... أهبل ..أهوس..... وفجأة 
الحرامي بصوت غليظ :بمبي ياروح خالتك ؟؟ ده انتي نهارك أسود النهاردة ... إرفعي ايدك ياولية ... وهاتي إللي معاكي لأخلي أكبر حتة في نافوخك قد الشلن
هاتي الشنطة بلاش غتاتة... يا ساااااتررر !!!... أما ولية سقيلة صحيح
فجأة وبدون مقدمات ظهر ظابط ما تعرفش منين وطلع مسدسه وفي قفا الحرامي
الست : أحمدك يا رب ! ... ظابط ؟؟ أحمدك يارب !!! يحيا العدل !!... جالك الموت يا تارك الصلاة!.. علشان تبقى
تتشطر على الستات يا حبيبي... ( وعلى ضحكة ماري منيب) : أههااهااااي
الست بتكمل فش غلها في الحرامي : ده أنا لسه قابضة الجمعية يا كفرة .... أحمدك يا رااااب
الظابط : مييين ؟؟ برعي ؟؟؟؟ يا نهار أبيااااااض ... بالحضن ياوااااااد ... فينك يا وسخ السنين دي كلها؟؟ بقيت حرامي ؟؟ طول عمرك شقي ... بالحضن بالحضن 
الست وهي هتتشل من الصدمة وبقها بدأ يتعوج فعلاً : إيه ده ؟؟؟ كمان بيحضنوا ويبوسوا ؟؟؟ يا ولاد الكاااااالب
الست وهي هتتشل من الصدمة وبقها بدأ يتعوج فعلاً : إيه ده ؟؟؟ كمان بيحضنوا ويبوسوا ؟؟؟ يا ولاد الكاااااالب
وراح اللون البمبي واسودت الدنيا في وشها خلاص والدم ضرب في نافوخها : أه.. يا بلد وسخة ... طلعتوا صحاب ؟؟؟ حاميها حراميها صحيح !!! وديني لأوريكوا ياولاد الكلب ومش هسيب حقي أبدا
جريت الست وهي متغاظة .. لغاية لما وصلت قسم الشرطة
وهناك : عايزة أبلغ عن حرامي حاول يسرقني ولما جه الضابط طلعوا صحاب ... عايزة حقي يا عالم
طبعا الروتين أخد مجراه وقالولها اكتبي محضر واحنا هنعمل اللازم .. ومن القسم على النيابة.. ومن النيابة ....على المحكمة .. آخر مرمطة وقلة قيمة وكأنها هي اللي سرقت ....وفي يوم الجلسة
الحاجب ينادي بأعلى صوته لحظة دخول القاضي
محكمة !!!!... قيام
طبعا يامعلم برعي ولطفي قاعدين في قفص الاتهام حالتهم كررررب !.. مش عارفين ايه اللي ممكن يحصل
....المهم
دخل القاضي بكل هيبة والدنيا هس هس .. ترمي الإبرة ترن .. والست يا عيني مستنية العدالة الإلهية على لسان القاضي الموقر
دخل القاضي بكل هيبة والدنيا هس هس .. ترمي الإبرة ترن .. والست يا عيني مستنية العدالة الإلهية على لسان القاضي الموقر
فتح القاضي أوراقه .. وبدأ الحاجب ينادي على القضية
بص القاضي على المتهمين من تحت النظارة .. وفجأة ضحك وقام وقف على حيله وراح الوقار خالص
القاضي وعلى وشه هبل الدنيا والآخرة : لأ لأ ما تقوليش بقى ؟؟؟ برعي ولطفي ؟؟؟!! هو انتو المتهمين ...ياحبايبي ( يضحك ويهز كرشه) ... ازيك ياواد منك ليه؟؟؟ إطلعوا إطلعوا .. نعالوا اقعدوا جنبي خلونا نفتكر الأيام الحلوة.. يامرحب يا مرحب ..ازيكوا يا عيال
.....النهاية
تقرير الإسعاف بيقول ان الست جالها هستريا في قاعة المحكمة أدت إلى شلل رباعي
وهطل مزمن وبقها طبعا اتعوج... ومن يومها ببقت تتكلم زي يوسف بك وهبي بالظبط وهي بتغني أغنيتها المفضلة : ياأبو الشريط الأحمر ياللي .. أسرتني ارحم ذلي
صحيح : إللي ليه ظهر ما ينضربش على بطنه
حافظ على صحابك يمكن في يوم من الأيام تقابل منهم حد يكون أصيل ساعة زنقة
واللي ما تحتاجش لوشه .. بكرة يمكن تحتاج لقفاه
تعليقات
لحد يومنا هذا لاحس ولاخبر
صديقه دمها خفيف قالت لي يمكن بابا نويل (سانتا كلوز ) عامل فيك مقلب ؟؟؟؟
فعلا الحراميه كتروا وسايبين بعض يسترزقوا علينا من زعيمهم لحد صغيرهم اللهم لطفك يارب في مصرنا الحبيبه
زيارتك لي شرف .. وكلامك في مدونتي ترف
:)
أنا طول عمري ما بحبش يوم الكريسماس ... شفتي أهو شقتك اتسرقت فيه اهو :)
فعلاً تحسي ان الناس توحشت ... ومش لاقي حاجة ارد بيها اقوى من اغنية عدوية الشهيرة ... زحمة يا دنيا زحمة
زحمة ولا عادش رحمة
زحمة وتاهو الحبايب
مولد وصاحبه غايب
هو فعلا مولد وصاحبه غايب
الكمساري بيقى عارف النشالين والملاقيط ويخاف يتكلم لا يغزوه .. ماهو عارف انه ضهره مكشوف ومافيش حماية
أما عن مسروقاتك ربنا يعوض عليكي وفي داهية.. طالما انتوا كلكوا بخير وما تفكريش كتير في الموضوع وتقعدي تقولي زي نور الشريف في فيلم العار : شقى عمرييي
تحياتي العطرة لشخصك الكريم