أساليب سينمائية لمقاومة التحرش الجنسي

إلى أخواتي وبنات عمي وبنات خالتي وزميلاتي وقريباتي و و.. و.. وأم عربي البقالة .. وكل النساء والبنات اللي اعرفهم واللي ما اعرفهمش إللي اترعبوا من موضوع التحرش إللي تفاصيله كلها منشورة في مدونة الوعي المصري هنا ..

وكمان في مالكوم إكس عند مالك هنا

أكتب هذه الكلمات بعد أن قرأت في إحدى المدونات خواطر أحدى الأخوات بعد أن سمعت أخبار التحرش الذي حدث في وسط البلد .. وهي :

أخي المتحرش كده عيب "

"أخي المتحرش ممنوع التحرش"

"منطقة امنه ممنوع التحرش"

"فخور لأني غير متحرش"

"مصر خالية من التحرش"

وفي الواقع ضحكت ، فالشعارات التي أرادت أن تنشرها - وإحدى البنات إللي علقت على الموضوع .. مثيرة للضحك .. بل والشفقة - واضح أنها مؤدبة وطيبة جداً يا عيني .. هو اللي بيتحرش ده بيقرأ ؟؟ ده عامل زي التور الهايج.. هو أساساً لو بيفكر ما يعملهاش .. حد عنده وقت يقرأ؟ والشعارات ما تجيبش نتيجة في الحالة دي

كذلك بعد أن قرأت في مدونة قطر الندى وهي تدعو الناس للتفكير في حلول لتلك البلوى الجديدة - في الواقع هي مش جديدة أبداً - المهم خواطرى حول الموضوع هي

إفتكري دايماً ... أنت الأقوى .. تقدري تخلي فضيحته بجلاجل 

طبعا أنا مش باتكلم عن التحرش الجماعي .. دي حاجة استثنائية علاجها أمني بحت .. شوية عساكر في المكان في المرة اللي جاية

أنا بأتكلم عن حالات التحرش الفردية

يا بنتي منك ليها .. أولاً لازم البنات والستات تبطل تخاف من الرجالة والشباب في الشارع والمواصلات .. ده زيك زيه .. والنوع اللي بيتحرش .. بيكون عامل زي الكلب ... لو شم ريحة الخوف في الضحية بيعضها.. إنما لو شاف منك صلابة وقوة وعدم خوف .. هيحط ( ديله ) بين رجلية ويجري

ثانياً ..اللي بيتحرش ده يا بنتي .. بنى أدم غلبان وعنده طاقه زايدة .. كل اللي هو عايزة إنه يلمسك .. عايز يجرب ملمس جسم الأنثى شكله ايه - دراعاتها .. بطنها .. صدرها !! .. مع كل الاغراء والرقص والبلاوي اللي بيشوفها في الشارع وعلى التليفزيون والانترنت .. نفسه يجرب يحط ايده على واحدة .. يلمسها بس

ثالثاُ .. إنتي مش عروسة حلاوة لو لمسك حياخد منك حته ولا هيضيع عذريتك ولا شرفك !! أبداً وبعدين الستات في العالم كله بتتعرض للتحرش .. حتى الستات في الجيش - الجيش الاسرائيلي على سبيل المثال.... والرجالة كمان بتتعرض لتحرش من الستات - يمكن ما شفتوش إنتوا .. بس موجود في الاتوبيسات والاماكن الزحمة

علشان كده .. اوعى تخافي ..شيلي الخوف والرعب من قلبك .. تلاقي نفسك قادرة تتعاملي مع الموقف .. إنما خوفك هيشجعه زيادة

أســــاليـــــب التعـــــامل في الحـــالات دي

في الواقع أسلم طريقة للبنت للتصرف في الحالات دي ... إنها تلجأ للناس في المكان ولا تتعامل مع المتحرش بنفسها أو تلجأ لسياسة الفضايح وخدوهم بالصوت لا يغلبوكم ... لأنه ممكن يكون شارب ولا متنيل بنيله أو يرد الاساءة بالعنف .. يقوم يؤذيها ، ممكن تدخل محل أو تطلب مساعدة أشخاص أو ويفضل يكونوا مجموعة علشان الموقف ينتهي لصالحهم

لكن لو مافيش ناس حواليها وكان مافيش مفر انها تتعامل مع الموقف لوحدها ... إليك بعض النصائح

حاولي تتجنبي الأماكن المنعزلة قوي.... والمزدحمة قوي

أولا .. لازم كل الناس رجالة وستات تفتكر إن التحرش بأنثى دي جريمة يعاقب عليها القانون بالحبس لمدة تصل 6 أشهر سوا كان كبير ولا صغير - فكريه بالسجن يمكن يرتدع 

ثانياً .. لازم البنت تعرف شوية حركات دفاع عن النفس علشان تعرف تمشي بأمان .. مش هأقولك روحي اتعلمي كراتيه .. بس هأقولك شوية حركات بسيطة ممكن تخليه يجري.. لو حد تحرش بيكي بجد .. تخيلي نفسك بطلة في فيلم من أفلام الأكشن .. خدي وضع دفاع عن النفس زي بتاع الأفلام وصرخي في وشه تقطعي خلفه من الخضة.. هيتخض ويعمل عيشة .. ويمكن يعمل ام الخير كمان

لو تطور الأمر وكان التلامس واضح ومباشر .. في حركات بسيطة تقدري تعمليها 

* ضربة بالكفين في نفس الوقت على الودنين - كأنك بتسقفي في فرح بلدي على خلقة اللي خلفوه - تخلي ودانه تصفر ويفقد تركيزه والدنيا توش وتوررر معاه .. قوم يكون عندك فرصة للهرب من المكان

* ضربة بسيطة ببطن إيدك في مناخيره - تقلب مزاجه على طول وينسى ويمكن يمشي لوحدة - من غير ما ياكلك بالقلم ... إنتى وحظك

* ضربة بسيطة في الحنجرة تخلية يقعد يكح ربع ساعة

* لو مسكك بإيد ولا بالاتنين .. ارفعي دراعاتك الاتنين من تحت لفوق - بقوة - وانطري دراعاته لبره .. حتى لو كان أقوى منك برضه لازم الحركة دي تخلي دراعه يتفك عنك - لأنه مش متوقعها - ويا سلام بقى لو برجلك وف ... انتي عارفه فين

*ومسك الختام ... لو كان الموضوع صعب قوي ومافيش مفر ... بركبك يا حبيبتي ولا بالشلوت لو كنتي لابسة بنطلون - في بضانه .. قصدي في محاشمه ... قصدي في المنطقة الحساسة ... لو كانت الضربة مباشرة تلاقيه يقع على الارض ربع ساعة مش قادر يقوم ..وطبعا يا اما تهربي بكبرياء وعزة .. يا اما الناس هتشوف منظره وهو حاطط ايديه الاتنين ووشه احمر ..هيفهموا الموضوع ويساعدوكي ( بس خدي بالك .. ممكن يموت فيها وتشرفي حضرتك عند عشماوي أو تخشي السجن وتخرجي منه الناس بتقولك ... سعيدة ياجدتي)

الأدوات

* يا ريت الشركات في مصر تستورد من الصين الصاعق الكهربائي -حاجة كده بتشتغل بالبطارية ولا بالشاحن

* السلف ديفنس - رشيه على وشه .. إعميه

* طلعي علبة السبراي ولا إزازة البرفان ورشيها في عينه

* وأخيرا ً لو مش معاكي حاجة .. تفي وفي وشه واخلصي .. برضه هيتعمي

في الميكروباس أو الأتوبيس ولا المترو ولا التاكسي

أما لو كنتي قاعدة وجه واحد تلم قعد يلزق في الحر .. مافيش داعي تقعدي تقولي .. إف إف .. إيه القرف ده ؟؟ . .. أحب أقولك يا حبيبتي الحاجات دي مش بتجيب نتيجة بالعكس .. الناس هتعقد تبصلك وتقولك هي مالها عاملالنا فيها خضرا الشريفة ؟؟؟؟! ما كلنا مزنوقين في الحر !!! بنات أخر زمن وتسمعي مصمصة ليمون للصبح في الميكروباس

الحل في الحالة دي هي أنك تعامليه على أنو برئ ومحترم إلى أن تثبت إدانته وتقوليله بكل احترام ممكن توسع شوية ؟؟ هيوسع لو كان محترم او غير محترم .. بعد شوية يلزق تاني .. تكون محطتك جات وتنزلي

أما عن سوست البنطلونات المفتوحة اللي بترعب البنات والستات في الموصلات العامة والحواري الجانبية .. فحلها بسيط جداً يا اخونا..... يا إما تصوتي وتلمي عليه الناس وتنزليه من الأتوبيس بفضيحة ...يا اما تشيلي معاكي في شنطتك ابرة وفتلة.. وخيطيلو السوستة المفتوحة دي ينوبك ثواب في الواد العريان ده - ربنا ما يعريلك جتة

وأخيراً ... بلاش اللبس الزايد قوي في الأماكن المفتوحة - لمي نفسك أحسن .. عشانك مش عشانا - مش بقول اتحجبوا- أبداً -.. بس أضعف الايمان اللبس المحتشم برضه بيمنع عن البنت - شوية بلاوي - مش بقول كلها

وأخيراً بقى .. حطي في بالك منك ليها .. أنك مش كل واحد لمسك غصب عنه في اتوبيس ولا في محل ولا في الشارع ... يبقى متحرش بيكي علشان تكون المسائل واضحة وما تظلميش حد ...المتحرشين دول.... اقلية جداً ....غالبية الناس محترمين ولسه بيحافظوا على البنت والست في الشارع

على فكرة الجدع ده إللي اسمه ربيع .. عنده شوية حلول باين عليها قوية وفعالة تقضي على المشكلة من لغاليغو .. قصدي من أساسها وكمان عند قطر الندى الحكاية ولعت قوي

إقرأ ايضا:  ايه: لازم ألبسلك جيبه قصيره وبلوزه عشان تركبني معاك

إذا أعجبك الموضوع: تابعنا باستمرار من خلال صفحتنا على الفيسبوك: مجلة لاكي سترايك أو اشترك بالقائمة البريدية ليصلك كل جديد | للتعليق: اضغط هنا

Searches related to تحرش جنسي
تحرش الجنسي في امريكا
تحرش الجنسي في الحافلة
تحرش الجنسي في مصر
التحرش الجنسي في باصات مصر
تحرش الجنسي في المغرب
تحرش فى المواصلات
التحرش الجنسي في السعودية
التحرش الجنسي بالاطفال